二○○○年開始，聯合國教科文組織（ＵＮＥＳＣＯ）訂二月二十一日為世界母語日，並且每年佇這工公告世界各地母語存亡的現況，強烈呼籲世界各國攏有義務替人類保存共同的語言資產。二○○一年ＵＮＥＳＣＯ所公告的世界各地母語存亡報告書內底，特別提起台灣的語言除了華語以外攏瀕臨死亡。台灣的本土母語—台語、客語以及原住民語雖然程度有無仝，不過仝款攏是已經需要保護的語言。雖然是台灣人的本土母語，毋閣嘛同時是人類的共有資產，咱無權利去共傷害、蹧躂。
真遺憾，今年母語日出現壓迫本土母語的反動行為。咱攏掠準台灣已經是一e多元文化、多語社會的民主國家！歧視語言、壓迫母語的野蠻行為應當是過去式矣。千想萬想想袂到，佇世界母語日進前，佇農曆過年前幾工，由國民黨立委洪秀柱提案，立法院全數刪除教育部國語會台語認證預算四千萬。四千萬佇一兆八千億的國家預算、六百億的教育部預算內底敢有佔著啥物輕重？雖然國語會苦苦相求，希望莫按呢做，若無，嘛莫總刪，因為舊年台語認證的試務工作佮試題工作攏已經標出去矣，上無嘛愛留一寡仔予咱辦母語教師的認證。結果四千萬刪甲無tshun半角銀！
按呢做是咧共台語族群明示啥物？講恁雖然是台灣上大的族群，毋閣恁上弱勢，恁上無路用！台灣逐種語言攏會使認證—華語會使認證，客語會使認證，原住民語會使認證，英語嘛會使認證，獨獨就是台語袂使！按呢做是咧共全世界暗示啥物？講恁祖媽就是野蠻人，欲共台灣的本土母語，一e一e屠殺予死，恁講阮有義務保護人類的語言資產？阮無權利屠殺母語？以前阮執政的時，屠殺台灣母語的任務猶未完成咧，今閣予阮提著政權矣，阮會繼續執行未完成的任務！
這敢無食人夠夠！母語日彼工咱一定愛有行動！
（作者為台師大台文所所長，世界台灣母語聯盟總召集人）
------------------------------------
日本之聲 介紹在日台灣人的活動，並提供日台交流的情報及資訊 歡迎轉載 轉載時請註明出處
投稿請寄本報編輯組: nihonnokoe@googlegroups.com 訂閱請寄空白信到: nihonnokoe-subscribe@yahoogroups.com 之後Yahoo將會寄一封確認信，題名為：Please confirm your request to join nihonnokoe，收到此信後原封寄回即完成訂閱 手續。
沒有留言:
張貼留言